Reflexionen › S`Lebn

 S`Lebn

Jo des Lebn, wie funktioniert des wirkli?

I hob mir moi Gedonken gmocht, warum muas ois so perfekt sei?

Muas i wirkli hochdeitsch schreibn das olle zufrieden san und weils sies so khert?

Warum ko i ned anfoch so schreiben wia`s mia grod eifoid, muas des unbedingt ois genau sei Richtlinie hom?

In meina Trainerausbildung hob is Präsentiern glernt, i hätt des in Hochdeitsch probiert. Tjo de Leit wos mi kennan wissen das des ned zu mia passt. Do hod mei Auszubildener gsogt i soid so redn wia ma da Schnobi gwochsn is, no do schau die o es funktioniert!

I hob mi moi entschiedn das is ondas moch, egal ob wea dabei is dem`s ned gfoid! Drum probier is moi bam schreiben.

Geht`s ned im Leben ima so, ois duat ma das ma den ondan gfoit und das ma gsehn wird, ima vo außn de Bestätigung hoin das ma guad is,…. bled oda? Wo erwischt di du dabei?

Wonn endli konnst du dia zugesteh das des ois guad is wiast bist und wost mochst??!!!

Tjo mi hom jo scho vü Leid in mein Lebn begleitet, i sogs eich des woa ned ima schen wonn ma draufkumt das ma fia sich söba verontwortlich is in sein Leben und das ma`s kann Recht mocha ko. 

Wo genau stehst du jetza, versteckst die du hinta a Fassade, das kanna mitgriagt wia`s da wirkli geht? Wia schaut`s in deinem Liebeslebn aus, konnst da du do zuagesteh das du in da Beziehung a Schuid host? Oda gibst de gonze Schuid dein/er Partner/in?  Wia gehst du mit Kritik bzw Ratschläge um, konnst de übahaupt onehma, oda duast die du do ima aussiredn weilst wast das des vielleicht wirkli guade Kritik/Ratschläge sei kunntatn? Bist du überhaupt fähig ondare zuzuhören und oznehma wos do is?

Bist du mit dir söba zfriedn? Selbstliebe?…..

Frogn üba Frogn,….

Oiso i brich jetza moi mei Fassade!

I bi genau so dringsteckt, i hob mi a nie richti zagn kina wer i bi und voroim wos i moch, i hob ima glaubt i muas jedem Recht mocha. Und mi so zagn wias fia ondare passt. Jo ned mit wem ostrafn!

I bin`s ma jetza wert! 

I hob ma zugesteh messn das i sehr feinfühlig bin, i gspier de Energien die du mit dia herrumtrogst. I gspier die Fassade hinter der du di vasteckst. I gspier sehr vü. I bewert des ned. Voroim des Bewertn mocht des Lebn so schwa und es bringt di ned wirkli weida. I gspier dei Inneres. Heilen, tjo a Heiler bi i koana, nua donn wonnst du bereit bist in Heilung zu geh. Obst das du onehma konnst oda ned liegt gonz ba dia. I bi guad so wia i bi und wem des ned geheua is , i vasteh`s, mia woas a long ned geheua. Jo i hob Fähigkeitn de wos i ma söba nia zugestehn woit, weil`s sie`s jo ned khert!

A konn i guad mit Tiern kommuniziern. Die san am ehrlichstn. Übahaupt hob i an sehr guadn Zugong zua Natur, des is mei Kroftfeld.

Des bi I.

Danke an mein Mo dea mia dabei ghoifn hod!!!